من روائع الشاعر باحوت
ماتقول داك مِرطب ، وداك بناها كباري
وداك راكب حديده انا ماني زيو خباري
لو بي فول فطرت ، دي نعمه من الباري
غيرك ياما واحدين قاعد اصومو إجباري
الطمع ان تِبعتو ،، وفيك صِبح مُتمكِن
تاني الصافي في عينيك بيبقى مُدكِن
ما دامك نصيح ،، وين ما تدور بتركِن
احمد ربك ،،،،، الغيرك بنوم بي مسكن
الشقي والبدور ،،،، في الدنيا يكتر ندمو
إقعُد اراعي مال غيرو وقصورو وخدمو
الما عندو مركِبه ،،،،،،،، عندو نعمة قدمو
والهِدم المُشرط اخير ،، كتير من عدمو
احمد ربك الوهاب ،،،،،،،،،،، وأذن وقيم
و اشُكّر النعمه ،، بي الشُكر النعم بتقيم
جناك الشايفو هايف وقلت فهمو سقيم
دي نعمه عظيمه ،،،،، بتمناها الف عقيم
ما تقول داك فلان فوقو النعم مكبوبه
وداك راكب برادو، وعندو كم محبوبه
لو اوضتك مِتلجه ،،،، ولا دافي هبوبه
غيرك للنفس ،،،،،،،،،،،،، رابطلهن انبوبه
اقبل بي النصيب ،،،،، الدنيا كلها عرضه
طالت ولا قصرت ،،،، حا تمش مِنقرضه
ان ما لقيت سرير ب نومة الوطه ارضى
غيرك في العنابر ،،،، ياما راقدين مرضى
ما تباري الطُغات، الكفره ناس لينين
رزقك كلو مكتوب ، قبل تبقى جنين
الفلس البكيت منو ،،،،، وقعدت تنين
غيرك ياما ناس صابرين عليهو سنين
ما تقول ديك نعيمن فوق عليهن هاطل
ولا قاعدين إسرقو ،، وتتهمن ب الباطل
المِهن المعاك ،،،،،،،،،،،،،،،، المٌنهن مِتماطل
دي نعمه كبيره ،،، بتمناها مليون عاطل
مراتب الحمد حاول ،،،،،،،،واجتهد ترقاها
سعادة الروح رضى وعدم القناعه شقاها
لو ماليك غير غرفه ،،،،،، بتنوم في تقاها
غيرك في البكوس ،،،،،،، راكوبه ما بلقاها
بجيك لابد نصيبك ماشي بي رجليهو
والما ليك بغلبك ، قدر ما تكوس ليهو
بدل الزول احسد الفوقو، احسن ليهو
يعد نعمو ويعاين ،،،، في الاقلا عليهو
خلك ديمه ، بين عكر الحياة و صافيها
شاكر سمحها ،،،،،،، وصابر على جافيها
ب السب والسخط نعم الله ما تكافيها
العندك في ناس ،،،،،،، لسع بفتشو فيها
يومك عيشو بهجة كانو يوم العيد
عمرك ما يضيع منك كتال و وعيد
الشال القناعه ،،،،،،، رماها منو بعيد
لو الدنيا جت في جيبو ماهو سعيد
قول ل الداير اجمع من علومنا حصيله
تعال الن حكي ليك ، القصه بي تفصيلا
شدة مانا ناس كرما ،،،، ونفوسنا اصليه
دمنا في التبرع ،،،،،،،،،،، بدي اي فصيله
الجود والتواضع والصدق في حديثنا
على طبع الاوائل ،،،،،، لم يتم تحديثنا
جارنا انحنا بنعزو ،،،،، ومحل تقديسنا
فارة جارنا ،،،،، ما بقرب عليها كديسنا
نحنا عِطرنا مو ريحه وفتايل ضفره
كم لله ناشلين ،،،، الوقع الفي الحفره
عربا نحنا إن جا غريب، بيعملو نفرة
ضل الضيف بختولو البرش والصفرة
البخل احنا قاطعين راسو ست ب السيف
والعز خضنا بحرو ،،،،، وشال سوانا القيف
نحنا كرمنا جادع غادي ،،،،،، قول لي كيف
كلاب حلتنا ،،،،،،،،، ما بشاكلن كلبة الضيف
نحنا بنبقي ،، للماعندو ضروه حصير
خصمنا نحنا مهما يبقى، عمرو قصير
نحنا الشبعه ،،، للضيف الغشانا مصير
بنضبح للكلب حقو ونجيب لي عصير
.
ما بطلق سهام نمي ،،،،،، واقولها صيدي
لأنو الروعه باسطه، ذراعه جوه وصيدي١
كان طلعت تلفوني ، وبديت ف قصيدي
إلا تخوني ،،،،،،،،،،، بطاريتي ولا رصيدي
النم عندي ،،،،،، شدة مو كتير ،، بِتصادم
بقيت بلبس جديدو ،،،،، وبترك الاتقادم
شان احصى النميم الفي دماغي اترادم
داير زي عصاة موسى ،،،، وعُمر زي ادم
لو نص ساعة جات ولقتني قاعد هادي
بنتج فيها نم ،،،،،،،، وقوافي يملن وادي
قدر ماتقيس قصيدي بتلقى لسع غادي
"الغناء عندي اسهل ، من كلامي العادي"٢
اسباب الغياب ،،،،، للقاعد اسئلو عني
زهجة شديدة جداً ،، والمزاج متدني
انا ما غبت بي سبب القصور في فني
" باحوت لمن يكون داير يغنى بغنى "
.
.
١- اقتباس من الآيه "وكلبهم باسط ذراعيه ب الوصيد"
٢- اقتباس من أستاذي يس ود الصغير.
داير زوجه فاهمة ،،، دماغه مو متطبل
سمحه سماحه يا قول الخلايجه تهبل
مطيعه تقولي ،،،،، لو قتليها داير ادبل
انا رضيانه يا باحوت ،،، محل ما تقبل
ما تكون بت مواكب كل يوم بتظاهر
ولا مغرورة ،، جنها بهرجات ومظاهر
بريئة وفي عيونا الرقه والحن ظاهر
وعندها بسمه زي بسمت ريان الظاهر
صفراء تكون ،، وعندها وجنتين ووجيها
مازولت نميمه ،،، وسب عروض ونجيهه
ساعة اكون مسافر ،،،،،،،، ولا مارق جيهه
تطبل روحا في البيت لمن امشي واجيها
ما تقول لي حقوق ويغشها القحاتي
تشطفني وتغسل ،،، كل يوم راحاتي
تقول لي لم ترفع ايدا فوق جلحاتي
انت احسن بشر في الدنيا يا بحاتي
تكون مسكينه مازولت هجيج زي مروه
اشرب من حنانه ،،،،،،، وريدا لامن اروى
جميله تكون وبلغت في الجمال الذروه
وما شغاله ،،،،،،، لكن برضو عندها ثروة
تكون عفويه ،،،،،،،،،،، مازولة عواره ونِقه
وذكيه تنفذ الشيء ،،،،،،، الطلبتو ب دِقه
كلها ذوق وحن ،،،،،، و دلال وطيبه ورِقه
وعندها في الملازمين كم وعشرين شِقه
تكون وناسه لي آخر الحدود وظريفه
معاي مسكينه ،،،،، لكن للبقيه حريفه
اقولها دايرا حاجه تكون بنيه شريفه
ردها ديمه ،،،،،، ما تخسر ولا تعريفه
خفيفه تكون ،،،،،،،،،،،، اذا ناديتا بِتب عاجل
وصوتا حنين ،،،،،،، احنه من الحمام الزاجل
تكون لي امان اذا جيت مضطرب او واجل
هيفاء وهبي جوه البيت وفي السوق راجل
دايرا بت ابوها ،،،،،،،،، ولا بتهمو قباحتك
وبتو ان دارتك عرض الفرح في ساحتك
اسئلا عن هموما ،،، تقولي خلي فصاحتك
انا ماف شيء بهمني يا عسل غير راحتك
هميمه تكون وعزمها ك الحديد ما بِفلا
رقيقه تنادي لي ،، لو دايره تفتح قِفله
ما بترابع القوم ،،،،،،،،،،،، الرعاع السِفله
دماغه دماغ كبار واردافا ارداف طِفله
.
.بنجود نحنا جودا ،، فوق علي مقدورنا
ما بنتدسي من ضيفنا ونضاري قدورنا
من ما قمنا ،،،،،، مليانات معزه صدورنا
الدايرنا خير ،،،، وحريقه ف الما بدورنا
نحنا بندخل العركه ،،، ام غبارا عكّل
بنتب نحنا للدركان ،،، محل ما سكّل
زي الحربويه ما بنكون ، ولا بنتشكّل
الما بدورنا بي حالتنا دي ، الل إتوكل
.
.بدايتي مع المعايش كانت احلى بدايه
كل الجات تبارك ،،،،، ،جبت ليها هدايا
من ولدوني جيت ، ،،مليانه كلتا يدايا
حلفت علي ابوي ، ودفعت حق الدايه
عن تاريخي يا السائل بجيبلك سردي
حقائق كالو ،، مو جخ السفيه المردي
مولود 5 مايو ،مرقت في يوم فردي
يوم ولدوني ،،، ولعت النجوم بالوردي
من ماقمت ناجح ،،،،،،، والبدورا بصيده
عندي تمنيه صرافات ،،،،، ملانه رصيده
لبن ما رضعتو ،،، اول وجبه لي عصيده
بعد ولدوني بي نص ساعه قلت قصيده
من ولدوني شاطر ،، واسي لسه تراي
ناس الفيزياء زاتن ،، عندي فيهن راي
سويت حركه ما بسيها ابن انثى وراي
التور حق سمايتي سلخت جلدو براي
.
.زمان بتمنى لكزس ،،، لونا اسود غاتمه
ومال امرقبو ، من لوم النفوسن شاتمه
هسي مع المعايش ،، والظروف الكاتمه
بقيت ما عندي أمنيه إلا حسن الخاتمة
.
.لا ضيف زارنا مره ،،،،، ولا جا واحد سلم
والبت عادي كاشفه ،،،،،، وابوها ما بتكلم
اقول ساعة اطرا عربي ،، وباديتي واتالم
إذا كدي دي الثقافه ان شاء الله ما نتعلم
بلدن فيها تهنا ،،،،،،،،،،،،،، وانقطع دابرنا
مابتشبهنا ،،،،،،،،،،،،،، لكن الظرف جابرنا
جارنا بدون سلام كل يوم بمش عابرنا
حيين ولا ميتين ،،،،،،،،، زاتو مو خابرنا
كل المارى لابس ،،،،،،، في رقبتو قلاده
ما بتفرز بنات ،،،،،،،،،،، الحله من اولاده
اسمع واجبه اقول الواجبه ديل تيلاده
افوت القاها بت ،،،،، الليله عيد ميلاده
إن كوركت وين ،،،،،،،،،، البفزع الدركان
ساعته يقن انو ،،،،،،،،،، الحى برا سكان
البيت الملان ،،،،،،،،،،، وبناتو سته مُكان
ابوهن ساعة اجوع بتعشى في الدكان
كلامن كلو بس ،،،،، عن الغلا واهوالو
وداك طعنو الحرامي وهددو وسوالو
البتدور تفقدو ،،، عشان تعرف احولو
إلا تخش تعاين ،،،،، حالتو في جوالو
المره في الفرن حابساهو من الشرقه
والابو في بطن بيتو ومحارب المرقه
فاسخين بره فعلآ ،، بس قلوبن زرقه
جت بينومو جوه، بخافو من السرقه
تسمع ب المدينه ،، ومجتمع متطور
تجي تقابلك مصايب لما راسك ادور
جارك ان سمعبك ،، جاكا لص متهور
بدل يفزع معاك ، ببعد واقنب اصور
مع ناس قيس وهيثم وضيفني يا ابوالزيك
الما بسوى بعره ،،،،،،،،،،،،،،،،،،، بسبك وبهزيك
يمين ان جعت ،،،،،،،،، ما فيهن جنى بغزيك
وان الوالده ماتت ،،،،،،،،،،،،،،، جارك اابعزيك
يوم هميت وقلت ،،،،، الدنيا لسه عِصير
ادق باب جاري شان اعرف وافقد الغير
بعد نص ساعه زولك ،، حته جرا السير
اول كلمه قال لي ،،،،، جاي مالك خير؟!
مشيت للبعدو عاين واتمحن في هدومي
لا خش لا مراحب ،،،، لا فرح بي قدومي
ساعة شافني ابيتو ، وقمت صار قدومي
قال لي اوري "ننو" تسوي ليك اندومي؟
.
.
مذكرات "ريفي في زمن الحضاره"
نظم افتراضي.
قابل للإضافه
بنوت حوه كسرن ، يا محمد طوقن
قعدن عادي يحكن، للخلايق شوقن
انا ما في غناهن ،،، لا ضحالة ذوقن
انا في العالم القاعدين ابشرو فوقن
تكتب في الغزل والناس وراها تردد
شنبو وبنطلونو ،،، وماشه لسه تعدد
ان قتليها عيب بتجوط معاك وتهدد
والناس البعلقو ،،،،،، بمرقوك متشدد
تشكر خلقة المحبوب وحضنو الدافي
ولسع ماشه تنزل ،،، لي تحت يا كافي
يا البتقول ابشري ،، ويا البتبلها حافي
الدين خلو غادي، رجاله ساكت مافي؟!
توصف ليك مشيهو وقعدتو وكيف لابس
وتشتكي منو ،،،، هاجرني ومطول عابس
انا ما في البغنن ،،،،،،،،، راسن اصلا يابس
انا في القعد اعلق في الحساب ويكابس
تكتب يومي كل واحده ، وتشكر كيره
ناسيات دين محمد والحديث والسيره
العِجب البعلقو ،،،،،،،،، يكتلوك بي حيره
لا دين لا رجاله ،،،،،،، ولا شرف لا غيره
عادي البت تغني ،، وفوق حبيبا تألف
ومرات بي خدود وبي عيونو تحللف
زمنا شرو مجان ،،،،،، إلا خيرو بكللف
والقال النصيحه ،بقولو زول متخللف
شنبك كيف ،،،، وما عارف عيونك دره
واحدات عادي بمشن غادي من الصره
ان قتليها عيب ،،،،، تسمع كلاب السره
"يازول مش حسابه تغني ساكت حره"
تعاتب في حبيبا وتشتكي الحِرمان
فراقو تقول جهنم ،،،، إلا قربو أمان
تعمل في عمايل ،،، وتدعي الإيمان
ما عملوها ،،،،،، اهل الجاهلية زمان
تلقى الوحده جاهلة ، غناها كلو قشور
لا هاميها بعثِ ،،،،،،، ولا حساب ونشور
العجب الخروف في الحساب محشور
ابشر ليها ،،،،،،،،،،،،،،، قبل تنزل المنشور
حبيبي وسيم تقولك، بالعيون لو اشر
الكون يبدا يضحك ،،،،،، والأيام تتبشر
ان قتليها اخجلي ،،،،،،، ولا وشك كشر
كلاب السره ،،،، بتقول ليكا ما تتحشر
تقولك يوم لقيتو وكنا مارقين سوا
ابتسم البريدو ،،، وثغرو شالع ضوا
ان قتليها عيب ، بتقوم معاك العوه
بقولولك بلاش لا تضطهد بت حوه
القاعدين ابشرو .... واعتذر عن "شطحي"
ما باقيلن إلا ،،،،،،،،،،،، يقولو ليها "انبطحي"
انا خليني في نمي ،،،،، ومشاكلي ونطحي
وجرب هسي انصح شان امرقوك سطحي
.
.انا في الدنيا ،، قابلت الدماغو مليس
ولاقيت الغفير ،،،،، الاذكي من الريس
الخير شفتو من زول كنت منو مئيس
والشر جاني ، من الكنت قايلو كويس
شفت العزمو زي، عزم الأصيل الصاهل
وين ما تقولو قاسي بقولك ابشر ساهل
شفت " الما قرأ " ،،، ومن الفضائل ناهل
ولاقيت عينة ،،،، الشايل شهادة وجاهل
.
.12/8/2018
اول مربوعه كتبتها في حياتي..
قول ابدعنا ،،، في نظم القوافي واجدنا
قول جمّعنا ،،،،،،،، أملاك كسرى منها زدنا
قول سكينا درب الريد ،،،،،، عشقنا وردنا
برضو العامره فانيه وفي إنتظار موعدنا
.
.
الكرم اصلو والجود، والتواضع رفققة
والخوف والبخل ، اولاد اعم الشفققة
الحنضل بيشرب وما بجود بي صفقة
والنخل ،،، العطش ما بردو من النفقة
الكرم اصلو معروف، والشجاعه اخِله
والخوف والبخل، اولاد اعم في المِله
العز قاسي وأسهل حاجه عيشة الذله
لأنو العزة تحتاج ،،،،، لي شهود وادلة
.
.لو بقى بي المظاهر ،، و الشكل بتقيس
كيف تعرف تلاتاء اليوم دا ولا خميس ؟!
العلبه اابتخلي ،، الفالصو يبقى نفيس
ولا بقِل الدهب ،، لو ختو جوه الكيس
الشغله أن مظاهر ، كنت كيف يا ذوق
عرفت الفرق بين، لبن الحمير والنوق؟!
الأسد ابتزلو ، ان سيتلو طبله وطوق
ولا بعز الديوك ، نوم البيوت ب فوق
الشقى قالو بين باب الحكيم والقاضي
والهناء كلو " كونك بي نصيبك راضي"
كيفن ببقى حُر الما ابو حُر في الماضي
النقاع بيتملي موية ،،، والزير فاضي؟!
الحُر طبعو ،،، من طبع الملخبت ظاهر
والعز ما بضوقو ، ال بي الرزيله مجاهر
آخر زول بِقول بعرف بسوي .... الماهر
واول زول بجيب سيرة العفاف، العاهر
الما واعي ،،،، وال عن رتبتك ما ادرك
ترا مجارات غباهن من عُلاك بتحدرك
العِز مو لِسان ،،، خل عِزتك في سدرك
" وابقى قدر كلامك ، ولا قول القدرك "
الإرث والمراجع ،،، والكتب بتنُص
انو الشر بِعُم ،والخير ثوابو بخُص
الساس قالو، قبال فكرة انو ترص
"ما بنوم البقنب في مقاعد النص"
.
.
بذور التقوى والخير شتتن في جروفك
وحاول قبل ما تنضم ،،،،، تنقى حروفك
الخانوك وظلموك ،،،، واستقلوا ظروفك
أملا ضهر غباهن ،،، بي سياط معروفك
مُرك وظرفك الحالى وهِظارك وجدك
دخل فيها عقلك ،، قبل ماتخش يدك
الفات حدو ، مايغُرك تفوت من حدك
"عدم الرد اشد على السفيه من ردك "
شيد عندك المعروف، وعللي صروحو
وأعلم إنو عند الله الحقوق ما بروحو
قابل بي الجميل، القابلك بي جروحو
وماتديهو كف ،،، اصبرلو بكفت روحو
علوم الدنيا كلها ،،،،، ما بتفيد مُرتاب
وذرة من اليقين ،،، بتعادل الف كتاب
الدني والسفيه ،،، والواشي والبغتاب
سكوتك عن عتابك ليهن اقسى عتاب
.
.الجري في الغرام، خلف البيجفل ذِله
واي فراق بهون ، كعب البفارق المِله
قول للقاعد إبكو ،، بتبكو وين العِله؟!
من عدم الفهم ،،،،،، ولا النسون قِله؟!
كم لله ناسا ،،،،،،،،،، من حياتنا اتوارو
لا سدو الهبوب لا الكون طفت انوارو
أهلا والف مرحب، ب البدورنا جوارو
والداير يفوتنا ،،،،، بندي حق مشوارو
زمان انا قلت بطن الريدة ما بحُكوها
وماف بت بالغرور ، والافتراء بزكوها
يا الحبست رسايلا شان نقول فِكوها
يابت انتي ،، من زمن المرة بسكوها؟!
مرحب بالفراق ،،،،، لو ناقصو ترحيبتنا
ربي عليك اغتي واجيرنا في مصيبتنا
امكن تلقى ناسا ،،،،،، اسدو ليك غيبتنا
لكن تاني وين ،،،،، حا تلقى زي طيبتنا ؟!
بعد من دون سبب للحسـره سلمتيني
ليك انا ما بعود ،،،،، لو يومي كلمتيني
معاكي اصبحت قاسي ، لأنك آلمتيني
ماكان بعرف اجرح ،،،،،، أنتي علمتيني
كتير الخان عهود الريد ،،،، بعد مضوهو
وياما احبة ،،،،، ندمو على زمن قضوهو
دام قلبك ،، مشاعري وحبي ما رضوهو
خلاص اعتبري ريدنا الجنجويد فضوهو
كنت البهجة لي ظرفي البيشكي رداوة
وبيك مرضان واقول ياربي ما اتداوي
قسيت عاديتني ،، فارقتك بكل هداوة
لأنو الريدة ،،،،،،، مابتتحمل اي عداوة
زمان ودعنا ريدك ،،، والبيان ذعناهو
كيفن هسي تبكي تقولي ماسمعناهو
يا غالية اعتذارك ،،، تانى إيه معناهو
بعد خرجنا منك ،،،، والخروج بعناهو
رووح ساي فوق كم روحنا متحديها
لاك مالك فرحنا ، ولا الهبوب ساديها
نحنا البمشي من ريدتنا ،،،،، متعديها
ان مات تاني فيهو الفاتحه ما بنديها
الريدة البتجلب ،،،،، ذلة لي حلبتنا
بنقنع منها ،،،،،،، ونرميها لي كلبتنا
نحنا ااغالية من طين المعزة نبتنا
ما بندرع الناس ،،،،، النفوسن ابتنا
بنعليك ،،،،،،،، اذا عرفناك بتعلينا
وان جافيت بننزل قبل ما تدلينا
ما بنرخص ونستناك تجي تغلينا
يا تقبلنا زي ما نحنا ،،، يا تخلينا
البيجينا خطوات ،،، نحنا بنمترلو
ومن اجسادنا لو احتاجها بنبترلو
الرايدنا ،،،،،، من الريدة بنكترلو
والفايتنا بنقول ،، قشة ما تعترلو
.
.
قلتي نصيبي اعوج إنتي م اتعوجتي
سألت نصيبي أنكر ،،، كل ما روجتي
بي تاج غيري مقتنع ،، إنك اتوجتي
بس كيف اقنع الشوق إنك اتزوجتي
زوجك ،،،، يا العنادك بي السهام ماطرنا
شالك وشال معاك ،البسمه من فاطرنا
ياهو قدرنا عاد إن قلنا خير وان طرنا
خاطرو الانجبر ، سبب انكسار خاطرنا
دام اداك سواي ،،،، والحظ حكم إبتعدِك
رضيت القسمه ،، ينتم لك هناك وسعدك
سنين من فتى مرت ولسه حافظ وعدك
لا حبيت سواك ،،،،، لا ملت لي بت بعدِك
مال و انبت حيل صبري ،، وعنادك هازمو
هلاكي على رصيف ساحل غرامك جازمو
وراك أنا بي وراك، الشوق صبحت ملازمو
كان عازمني أمس و الليله ب الليل عازمو
بقول للقاعد اسئل ،،، والبدور مؤجزنا
ما جاز لينا غيرك ،، ونحا ليك ما جِزنا
انا وذكراكِ لسه ، من الحرب ما عجِزنا
كل يوم نتصرع، والنوم أخش إحجِزنا
عشقتك والله من قلبي وهواكِ فتنى
إلا فًرص حظوظك ،، اصلو ما واتنى
انا قبلان ولسه على الرصيف مستني
اكون أسبير ،،،، إذا جاز ليك إنو تتنى
.
.انا : انسان ضرير ،،،،، في دار ملانه مصائد
عمري : اتنين وعشرين جرح وسته فصائد
ساكن : قرية الأحزان ،،،،،،،، نهاية ال صايد
شغلتي : بترجم ،،،،،،،،، افكار البعانو قصائد
هوايتي : ابحت واجيب من الحروف انتاج
مهارتي : بسوي من ،،،،، قالب العدم مؤنتاج
طبعي : طبع ملوك ، بس وين الم في التاج
امنيه : اكون سند ،،،،،،، لي كل زول محتاج
انا في قلبي ،،،،،،،،،،،، لا غل لا حسد بدخلي
بعز الداير اعزني ،،،،،،،،،،،،، والبكوس لي ذلي
بكره حبه حبه ،،،،،،،،،،، وقاعد احب بي كلي
وبواجه الحر عشان خاطر البعيش في ضلي
انا في الدنيا ،،،،،،،،،،،، نادر ما اكون ممهول
حلولي صغيره داب تحبو ومشاكلي كهول
"أرق وسهاد" ويأس وهم " وحن وذهول"
"بين حاضر بدون معنى" ومصير مجهول"
انا من عينة الناس ،،،،،،، القلوبن طيبه
بزرع خير وبحصد في النهاية الخيبه
اعدي ايام نصيح تقوى وعباده وهيبة
وايام ابقي زي ،،، عتبه وربيعه وشيبه
صبح شاعر مخررف، ، والدرب فكيتو
بقيت بمرق نميم من راسي لو حكيتو
تركت الجاني واقف ،، والجفل سكيتو
والزول البجيب لي ،،،،،،،، الفرح بكيتو
انا في الدنيا ،، قابلت الدماغو مليس
ولاقيت الغفير ،،،،، الاذكي من الريس
الخير شفتو من زول كنت منو مئيس
والشر جاني ، من الكنت قايلو كويس
نبكي على البغيب ،،، ودموعنا بتوضينا
ومهما الهم ملانا ،،،،،،،،، البسمه بتفضينا
في السنه بس رساله ان جاتنا بتقضينا
قاسي زعلنا ،،،،، وابسط حاجه بترضينا
على نياتنا عايشين ،،،،، وشنا اابنصرو
والخاونا بنغز ،،،،،،،،،،،،،، نفسنا وبنجرو
ما بنحضر سمح زولنا ونغيب في مرو
وان ما الزول نفعناهو اصلو ما بنضرو
نحنا الكل ما ابتدت الحمامه السجعه
شوقنا يزيد، وتشرد من عيونا الهجعه
بين سندانة الغربه ،،، ومطارق الرجعه
ندس الهم ونضحك جوه عين الوجعه
لينا نظامنا عايشين بيهو ،،، واول بِندو
واحد عندنا الفي الكون زنوجو وهندو
ما بنتغافل الصاحب ،،، البدورنا نسندو
ولا بنشكر الزول ،،،، شان نشيل العندو
.
.
تعليقات
إرسال تعليق