مجادعات بين السر الماحي وجعفر سعيد واحمد جبريل

مجادعات..ومشاغلات.. وهترشات

بين( السر الماحي) و(احمد جبريل..)

و(جعفر سعيد..)

قال السر :

جرح الريدة بين احشاي طال واتمدد..

وكل ما جاتني سيرتك يتفتق يتجدد..

ارجوك يام سماح وبي حبي ليك اتودد..

يا ريت يبقي ليمك لي متاح ومحدد..

..

جعفر قال:

الليلك يا السِرير وين نلقى ليهو علاج ..؟

مليان بالفهم والله ماك مـحتاج ..

العندو الدهب ليه كايس الكوماج ..

باقي لي بس .. بس داير الكُرباج

السر :

جمر الريد مولع فيني دائماً قاج ..

اسوق الليل سُقد لا شقة الفجاج ..

ياصحبي الغرام قلل عزيمتي وهاج ..

باقي لي اخير ابرى التكارين داج ..

جعفر قال: 

دُق الباب عديل ما تمشي بالنفاج ..

والدرب المُمندل ما بدورلو لز لا صاج .. 

قدامك يمين ان شاءالله ما تحتاج ..

والعام اليليهو .. يالماحي برضك حاج ..

احمد جبريل قال :-

للزول العيونو كذا السيوف الباتره ..

خُت الكورة ارضاً ما تشوتا مشاتره ..

شبه الفي الوِدَيّن وبالعسائن خاتره ..

اكسب وُدوا بِتبرد عقاربو الناتره ..

السر قال :

علاجي انا يالحبيب ما بعرفو ليهو دكاتره ..

علاجي انا في العيون الناعسه ديمه وفاتره ..

كبسني الهموم نزلن علي متواتره ..

وجوه حشاي بتفرم يومي تب مو مخاتره ..

جعفر .. :

الزول البِشوت الكوره ..منو تصّرج ..

تلقى برااااهو ما عندو زول متفرج ..

بس ياهو السِرير شايل الفتوح ومعرج ..

منتظر الكريم ياربي ساعد وفرج ..

السر ..:

صاحبك ياللبيب من المشيب متحرج..

نار الغي تملي لهيبا فيهو مسرج ..

مكحول الطريف الما طلع متبرج ..

ربنا يحفظنا ونحن ليـنا يفرج ..

وفي التعليقات تدخل الشاعر كمال الشراقي 

وقال : 

أياكم كبارنا وفي النحيب غدوتنا

ومن نوع بكاكم اتشققت كبدتنا

ريادين شديد وبيكم تفوح وردتنا

كتير كايسين لقاكم الا الدنيا ما أدتنا

تعالوا نعمل نادي

هههههه

رد عليه جعفر سعيد بالقول :

حاشانا البكا ..اصلـــو الشعر متعـــــتنا

نرتاح للحروف. فوقن نخت صفحـتنـا

كايسين للنفيس. كم ليه نحنا بحــتنـا

نكتب بالنهاار....بالليل نجر سبحـــــتنا

فرد عليه الشراقي بالقول : 

تيلاد الصلاح حاشاكم التجريس

وقاسيات الحروف منكم مابتدور تحنيس

الكلمه التكتبوها عند الغيركم بتصبح ميس

إلا ود جبريل دا عندي في مرتبة ناس قيس

التحية لكم شعراء ومبدعي نهرالنيل