شوقي للسارة القديمة شعر علي العقيد
الشاعر علي العقيد يسترجع بقريحته المتوقده ذكريات ايام الصبا التي عاشها في منطقه الساره قبل ان يشرد اهلها بفعل مواسم الفيضانات التي غمرت منازلهم فأضطروا للرحيل عنها مكرهين ..
شوقي للسارة القديمه القمح لابساه توبه
ضفة أجدادي السعيده الراوي غنى وفوقه دوبه
ياريتني ارجع وتاني اعيد السنين تحلالي دوبه
انظر الشرق المثالي وقبة الشيخ ودقلوبه
*****
من غربنا تشوف شرقنا القطر ياداكا ساير
مراكب الحواته تردح فوق عباب موسم الدماير
البوابير صوتة ساقت تريانه رويانه الجزاير
ودرة الريف الأبيه ضافره قلب الدوم ضفاير
*****
يأبه بتزكر زمانك كنته بدري النيل تصابح
فاجي بين صفصاف دريبك السقد من تحتو سارح
مسكته مدراك قمته كاسح
المقاديف شاقه موجه الوزيزين عدي سابح
العزاء الكان في دقائق تلقي بالكوراك وصلنا
تلقانا قدام القبايل نحنة اول ناس عرفنا
مركب الأحزان تسوقنه تعدي غادي تفوت جرفنه
وتاني نرجع للد يار يمسح النسام جرحنه
يرسل النيل لينا نسمة تجينا بيفوق في خلانا
الشمس بالجد عافيه لينا فيها ياخلاي دوانا
يدرس النورج ينورق والحزم بالحب ملانا
حسو بابور التعاون فوق نسايم الرحمه جانا
سنبل الموسم مبشر ماحصل لي نفوسنا خانا
نمشي للجول كان ندقق البواكير والعصاري
من ضراء السلم المخضر نسمع أصوات القماري
زكري في اعماقي عاشت مانسيته وليها طاري
لاسواري الليل تجينا ولاكمان لحظة طواري
تعليقات
إرسال تعليق